കൊട്ടിയൂർ ചുങ്കക്കുന്ന് വെങ്ങലോടിയിൽ കാറുകളും ഓട്ടോയും കൂട്ടിയിടിച്ച് ഏഴുപേർക്ക് പരിക്കേറ്റു
കൊട്ടിയൂർ: ചുങ്കക്കുന്ന് വെങ്ങലോടിയിൽ കാറുകളും ഓട്ടോയും തമ്മിൽ കൂട്ടിയിടിച്ച് ഏഴുപേർക്ക് പരിക്കേറ്റു. ഇതിൽ ഒരാളുടെ നില ഗുരുതരമാണ്. ഇന്നലെ വൈകുന്നേരമായിരുന്നു അപകടം. പരിക്കേറ്റ അഞ്ചുപേരെ തലശേരിയിലെ സ്വകാര്യ ആശുപത്രിയിലും മറ്റ് രണ്ടു പേരെ മാനന്തവാടിയിലെ താലൂക്ക് ആശുപത്രിയിലും പ്രവേശിപ്പിച്ചു. കാർ യാത്രക്കാരും അമ്പായത്തോട് സ്വദേശികളുമായ വാത്യംപള്ളി അച്ചാമ്മ (68), ഷാജി (48), എബിൻ (14), റെയ്ച്ചൽ (16), എതിർവശത്തെ കാർ ഡ്രൈവർ ജോബി (30) എന്നിവർക്കും ഓട്ടോ യാത്രക്കാരായ തോട്ടത്തിൽ തങ്കമ്മ (50) ,മഞ്ജു (24), എന്നിവർക്കും പരിക്കേറ്റു.
കാറുകൾ തമ്മിൽ നേർക്കു നേരെ ഇടിക്കുകയായിരുന്നു. റോഡിലുള്ള ഓട്ടോറിക്ഷയെ ഓവർടേക്കു ചെയ്യുന്നതിനിടെ ഓട്ടോയിലിടിച്ച ശേഷം എതിരെ വരികയായിരുന്ന കാറുമായി കൂട്ടിയിടിക്കുകയായിരുന്നുവെന്ന് ദൃക്സാക്ഷികൾ പറഞ്ഞു. ഓട്ടോറിക്ഷ തലകീഴായി മറിഞ്ഞു. മാനന്തവാടി,അമ്പായത്തോട് സ്വദേശികളുടെ കാറുകളാണ് അപകടത്തിൽപ്പെട്ടത്.