ഡല്‍ഹി കലാപം : കണ്ണൂരില്‍ ദേശീയപാത ഉപരോധിച്ച എസ് ഡിപിഐ പ്രവര്‍ത്തകരെ അറസ്റ്റ് ചെയ്തു

കണ്ണൂര്‍: ഡല്‍ഹിയില്‍ നടക്കുന്ന കലാപത്തിൽ പ്രതിഷേധിച്ച് കണ്ണൂരില്‍ ദേശീയപാത ഉപരോധിച്ച എസ് ഡിപിഐ പ്രവര്‍ത്തകരെ പോലിസ് അറസ്റ്റ് ചെയ്തുനീക്കി. ബുധനാഴ്ച വൈകീട്ട് അഞ്ചോടെ ചേംബര്‍ ഹാള്‍ പരിസരത്താണ് ദേശീയപാത ഉപരോധിച്ചത്. പ്രകടനമായെത്തിയ പ്രവര്‍ത്തകര്‍ ചേംബര്‍ ഹാള്‍ പരിസരത്ത് റോഡില്‍ കുത്തിയിരുന്ന് പ്രതിഷേധിക്കുകയായിരുന്നു. ജില്ലാ ജനറല്‍ സെക്രട്ടറി ബഷീര്‍ കണ്ണാടിപ്പറമ്പ് സ്വാഗതം പറഞ്ഞു. തുടര്‍ന്ന് ജില്ലാ പ്രസിഡന്റ് എ സി ജലാലുദ്ദീന്‍ ഉപരോധം ഉദ്ഘാടനം ചെയ്തു. ഉദ്ഘാടന പ്രസംഗം കഴിഞ്ഞ ഉടനെ ടൗണ്‍ പോലിസ് സ്ഥലത്തെത്തി നേതാക്കളെയും പ്രവര്‍ത്തകരെയും അറസ്റ്റ് ചെയ്തുനീക്കുകയായിരുന്നു. ജില്ലാ പ്രസിഡന്റ് എം സി ജലാലുദ്ദീന്‍, ജില്ലാ ജനറല്‍ സെക്രട്ടറി ബഷീര്‍ കണ്ണാടിപ്പറമ്പ്, ജില്ലാ കമ്മിറ്റിയംഗങ്ങളായ പി സി ഷഫീഖ്, എ ആസാദ്, എ പി മുസ്തഫ തുടങ്ങിയവരെയാണ് അറസ്റ്റ് ചെയ്തത്. ഉപരോധത്തെ തുടര്‍ന്ന് ദേശീയപാതയില്‍ ഗതാഗത തടസ്സമുണ്ടായി.

അതേസമയം ഡല്‍ഹിയില്‍ നടക്കുന്ന കലാപത്തിൽ 27 പേർ കൊല്ലപ്പെട്ടു 18 കേസുകളെടുത്തെന്നും 106 പേർ അറസ്റ്റിലായെന്നും ഡൽഹി പോലീസ് .സംഘർഷ ബാധിത പ്രദേശങ്ങളിലേക്ക് ഉന്നത പോലീസ് ഉദ്യോഗസ്ഥരുടെ നേതൃത്വത്തിൽ കൂടുതൽ കേന്ദ്രസേനയെ വിന്യസിച്ചിട്ടുണ്ടെന്നും പോലീസ് അറിയിച്ചു.

Leave a Reply

This site uses Akismet to reduce spam. Learn how your comment data is processed.

%d bloggers like this: