ഓണാഘോഷം വീടുകളില്‍ മതി: ജാഗ്രതാ നിര്‍ദേശവുമായി ഡിഎംഒ 


കണ്ണൂർ ജില്ലയില്‍ കൊവിഡ് കേസുകള്‍ വര്‍ധിച്ചു വരുന്ന സാഹചര്യത്തില്‍ ഈ വര്‍ഷം ഓണത്തോടനുബന്ധിച്ചുള്ള എല്ലാ ആഘോഷങ്ങളും അതീവ ജാഗ്രതയോടെ ലളിതമായ രീതിയില്‍ സ്വന്തം വീടുകളില്‍ ആഘോഷിക്കണമെന്ന് ജില്ലാ മെഡിക്കല്‍ ഓഫീസര്‍ (ആരോഗ്യം) ഡോ.കെ നാരായണ നായ്ക് അറിയിച്ചു. സമ്പര്‍ക്കമുണ്ടാക്കുന്ന എല്ലാതരം പരിപാടികളില്‍ നിന്നും പൂര്‍ണ്ണമായി വിട്ടു നിന്ന് രോഗവ്യാപനം തടയാനുള്ള പ്രവര്‍ത്തനങ്ങളില്‍ സഹകരിക്കണമെന്നും അദ്ദേഹം അഭ്യര്‍ത്ഥിച്ചു. 

നിര്‍ദേശങ്ങൾ
ഓണാഘോഷത്തിലെ പ്രധാന ചടങ്ങായ പൂക്കളമിടുന്നതിന് വീട്ടുമുറ്റത്തെ പൂക്കള്‍ മാത്രം ഉപയോഗിക്കുക. 
ഓണസദ്യ വീട്ടില്‍ നിന്നു മാത്രമാക്കുക, ഷോപ്പിംഗ് വീട്ടിലെ ഒന്നോ രണ്ടോ പേരെ മാത്രം ഉപയോഗിച്ച് നടത്തുക, പ്രായമായവരെയും കുട്ടികളെയും ഷോപ്പിംഗിനു കൊണ്ടു പോകാതിരിക്കുക. 
കടകളില്‍ സാമൂഹിക അകലം പാലിച്ചും മാസ്‌ക് ശരിയായ രീതിയില്‍ ധരിച്ചും മാത്രം കയറുക, വാങ്ങേണ്ട സാധനങ്ങളുടെ ലിസ്റ്റ് കുറിച്ച് കൊണ്ട് പോകുക, സാനിറ്റൈസര്‍ എപ്പോഴും കയ്യില്‍ കരുതുകയും ഇടയ്ക്കിടെഉപയോഗിക്കുകയും ചെയ്യുക.
കുടുംബ – അയല്‍പക്ക സന്ദര്‍ശനങ്ങളും ഒത്തുചേര്‍ന്നുള്ള ഭക്ഷണം കഴിക്കലും ഒഴിവാക്കുക. കിടപ്പു രോഗികളെയും മറ്റു ഗുരുതര രോഗമുള്ളവരെയും സമ്പര്‍ക്കമില്ലാതെ പ്രത്യേകമായി ശ്രദ്ധിക്കണമെന്നും നിര്‍ദേശമുണ്ട്.  
വ്യാപാരികള്‍ ആള്‍ക്കൂട്ടമുണ്ടാകാനിടയുള്ള സാഹചര്യങ്ങള്‍ കര്‍ശനമായി ഒഴിവാക്കണം. മാര്‍ക്കു ചെയ്ത ക്യു സംവിധാനം കാര്യക്ഷമമായി ഏര്‍പ്പെടുത്തണം. ഒരേ സമയം അഞ്ചിലധികം പേരെ കടയിലേക്ക് ഒരു കാരണവശാലും പ്രവേശിപ്പിക്കരുത്. മാസ്‌ക് ശരിയായി ധരിച്ചവരെ മാത്രമേ പ്രവേശിപ്പിക്കാവൂ. ഷോപ്പിംഗിന് മുമ്പും ശേഷവും കൈകള്‍ അണുവിമുക്തമാക്കാനുള്ള സൗകര്യം കടയോടനുബന്ധിച്ച് ഒരുക്കിയിരിക്കണം. കടകളിലെ ജീവനക്കാര്‍ മാസ്‌കും ഗ്ലൗസും അടക്കമുള്ള വ്യക്തിഗത സുരക്ഷാ മാര്‍ഗങ്ങള്‍ ശരിയായ രീതിയില്‍ ഉപയോഗിക്കുന്നുണ്ടെന്ന് ഉറപ്പു വരുത്തണമെന്നുമാണ് നിര്‍ദേശം. 
ഓണം മാനവ ഐക്യത്തിന്റെയും ഐശ്വര്യത്തിന്റെയും ഉത്സവമാണെന്നും കൊവിഡ് എന്ന മഹാമാരിയെ അതിജീവിക്കാനുള്ള ജാഗ്രതയോടെയും ഐക്യത്തോടെയുമുള്ള പ്രവര്‍ത്തനമാണ് ഈ ഓണക്കാലം നമ്മോട് ആവശ്യപ്പെടുന്നതെന്നും ജില്ലാ മെഡിക്കല്‍ ഒാഫീസര്‍ പറഞ്ഞു.

Leave a Reply

This site uses Akismet to reduce spam. Learn how your comment data is processed.

%d bloggers like this: