ജനകീയതയുടെ വിളംബരമായി കണ്ണൂർ മണ്ഡലം നവകേരള സദസ്സ്

ആർക്കും എതിർക്കാൻ കഴിയാത്ത പദ്ധതികളെ പോലും എതിർക്കുന്നു: മുഖ്യമന്ത്രി

സംസ്ഥാന സർക്കാറിന്റെ ആർക്കും എതിർക്കാൻ കഴിയാത്ത പദ്ധതികളെ പോലും എതിർക്കുന്ന സമീപനമാണ് യുഡിഎഫ് സ്വീകരിക്കുന്നതെന്ന് മുഖ്യമന്ത്രി പിണറായി വിജയൻ പറഞ്ഞു. മുഖ്യമന്ത്രിയും മുഴുവൻ മന്ത്രിമാരും പങ്കെടുത്ത കണ്ണൂർ മണ്ഡലം നവകേരള സദസ്സിന്റെ ഉദ്ഘാടനം കണ്ണൂർ കലക്ടറേറ്റ് മൈതാനിയിൽ നിറഞ്ഞ ജനക്കൂട്ടത്തെ സാക്ഷിയാക്കി നിർവഹിച്ച് സംസാരിക്കുകയായിരുന്നു മുഖ്യമന്ത്രി.
നാടിനെ കണ്ടുകൊണ്ടുള്ള, ജനങ്ങളെ കണ്ടുകൊണ്ടുള്ള സമീപനമാണ് സർക്കാർ സ്വീകരിക്കുന്നത്. എങ്ങിനെ പുരോഗതി ഉണ്ടാക്കാം എന്നതിന് ഊന്നൽ നൽകി. എൽഡിഎഫ് സർക്കാർ അത്തരം നടപടികൾ സ്വീകരിക്കുന്നതിന് തുരങ്കം വെക്കുന്ന നടപടികളാണ് യുഡിഎഫ് സ്വീകരിക്കുന്നത്. എങ്ങിനെ തകർക്കാം എന്നതാണ് യുഡിഎഫ് സ്വീകരിക്കുന്ന സമീപനം. ഇത് ബോധ്യമുള്ള ജനങ്ങൾ 2016ലെ എൽഡിഎഫ് സർക്കാറിന്റെ പ്രവർത്തനം വിലയിരുത്തി ഭരണത്തുടർച്ചയ്ക്ക് വിധിയെഴുതി. 2021ന് ശേഷം എൽഡിഎഫ് സർക്കാർ സ്വീകരിക്കുന്ന നടപടികളെ നാടിന്റെ പുരോഗതിക്കായല്ല, യുഡിഎഫ് കാണുന്നത്. എല്ലാ നടപടികളേയും എതിർത്ത് പദ്ധതി തകിടം മറിക്കാനാണ് ശ്രമിക്കുന്നത്. ഞങ്ങൾ പദ്ധതിക്ക് എതിരായതിനാൽ ഇത് ഇപ്പോൾ പാടില്ലെന്നാണ് നിലപാട്. എന്നാൽ, എപ്പോൾ എന്നതിന് ഉത്തരമില്ല.
ഇപ്പോൾ പാടില്ലെന്ന സമീപനം 2016ൽ സ്വീകരിച്ചിരുന്നുവെങ്കിൽ ദേശീയപാത വികസനം, ഗെയിൽ പൈപ്പ്‌ലൈൻ പ്രൊജക്ട് എന്നിവ യാഥാർഥ്യമാകുമായിരുന്നുവോ? ഈ കാലയളവിൽ പൊതുവിദ്യാഭ്യാസം, പൊതുജനാരോഗ്യം, വ്യവസായം, കാർഷികം, ക്ഷീരം എന്നിങ്ങനെ എല്ലാ മേഖലകളിലും വലിയ പുരോഗതി നേടി. ഒന്നിനും അനുവദിക്കില്ലെന്ന കേന്ദ്ര സമീപനം നമ്മെ സാമ്പത്തികമായി ഞെരുക്കുകയും ശ്വാസം മുട്ടിക്കുകയും ചെയ്യുന്നു. സ്വാഭാവികമായ തകർച്ചയ്ക്ക് കേരളത്തെ വിടാൻ കഴിയില്ല. അതിജീവിച്ചേ മതിയാവൂ. ഓഖിയും നിപയും മഹാപ്രളയവും കാലവർഷക്കെടുതിയും കോവിഡും എല്ലാം നാം അതിജീവിച്ചു. ഇതും നാം അതിജീവിച്ചേ മതിയാകൂ. ജനങ്ങളുടെ ഐക്യവും നാടും നാട്ടുകാരും നൽകുന്ന പിന്തുണയുമാണ് സർക്കാറിന്റെ കരുത്ത്. ധൈര്യമായി മുന്നോട്ടുപോകൂ, ഞങ്ങൾ കൂടെയുണ്ട് എന്ന സന്ദേശമാണ് നവകേരള സദസ്സിന്റെ മഹാറാലികൾ നൽകുന്നതെന്നും മുഖ്യമന്ത്രി പറഞ്ഞു.
രാമചന്ദ്രൻ കടന്നപ്പള്ളി എംഎൽഎ അധ്യക്ഷനായി. മന്ത്രിമാരായ അഡ്വ. കെ രാജൻ, റോഷി അഗസ്റ്റിൻ, സജി ചെറിയാൻ എന്നിവർ സംസാരിച്ചു. സംഘാടകസമിതി ജനറൽ കൺവീനർ എഡിഎം കെ കെ ദിവാകരൻ സ്വാഗതം പറഞ്ഞു. മറ്റ് മന്ത്രിമാർ, അഡ്വ. വി ശിവദാസൻ എംപി, ജില്ലാ പഞ്ചായത്ത് പ്രസിഡൻറ് പി പി ദിവ്യ, ജില്ലാ കലക്ടർ അരുൺ കെ വിജയൻ, മുൻ മന്ത്രി ഇ പി ജയരാജൻ, മുൻ എംപി പി കെ ശ്രീമതി, പന്ന്യൻ രവീന്ദ്രൻ, എടക്കാട് ബ്ലോക്ക് പഞ്ചായത്ത് പ്രസിഡൻറ് പി കെ പ്രമീള, മുണ്ടേരി ഗ്രാമപഞ്ചായത്ത് പ്രസിഡൻറ് എ അനിഷ തുടങ്ങിയവർ സംബന്ധിച്ചു.
സദസ്സിന്റെ ഭാഗമായി 15 കൗണ്ടറുകളിലൂടെ പൊതുജനങ്ങളിൽനിന്ന് പരാതികൾ സ്വീകരിച്ചു. വിവിധ കലാപരിപാടികളും ഉണ്ടായിരുന്നു.