ചെറുപുഴയിലെ കരാറുകാരനായ മുതുപാറക്കുന്നേല്‍ ജോസഫിന്‍റെ മരണം അന്വേഷിക്കാനായി പ്രത്യേക സംഘത്തെ നിയമിക്കുമെന്ന് തളിപ്പറമ്ബ് ഡിവൈഎസ്‌പി രത്നകുമാര്‍ പറഞ്ഞു. ജോസഫിന്‍റെ മരണത്തില്‍ പ്രതിഷേധിച്ച്‌ ശക്തമായ പ്രതിഷേധം ഉയരുകയാണ്. ആശുപത്രി കെട്ടിടം പണിത വകയില്‍ 1.34 കോടി രൂപ കിട്ടാനുണ്ടെന്ന് ഇദ്ദേഹത്തിന്‍റെ ഭാര്യാ സഹോദരന്‍ രാജന്‍ സെബാസ്റ്റ്യന്‍ പറഞ്ഞു. പണം കൊടുക്കാതെ ജോസഫിനെ വഞ്ചിക്കുകയായിരുന്നുവെന്നും ഇതാണ് ജോസഫിന്‍റെ മരണത്തിന് കാരണമെന്നുമാണ് ആരോപണമുയരുന്നത്. കണ്ണൂര്‍, കാസര്‍ഗോഡ് ജില്ലകളില്‍ നിരവധി കെട്ടിടങ്ങള്‍ നിര്‍മിച്ചിട്ടുള്ള ജോസഫിനെ അറിയാത്തവരാരും തന്നെ ചെറുപുഴ മേഖലയിലില്ല. ഇതുവരെ ഇദ്ദേഹത്തെക്കുറിച്ച്‌ യാതൊരുവിധ ആരോപണങ്ങളും ഉയര്‍ന്നിട്ടുമില്ല. ഇതൊക്കെയാണ് ജോസഫിന്‍റെ മരണത്തില്‍ ജനങ്ങളില്‍ വന്‍ പ്രതിഷേധമുയരുവാന്‍ കാരണം. ഇന്നലെ വൈകുന്നേരം സംഭവത്തില്‍ പ്രതിഷേധിച്ച്‌ ഡിവൈഎഫ്‌ഐ യുടെ നേതൃത്വത്തില്‍ ആശുപത്രിയിലേയ്ക്ക് മാര്‍ച്ച്‌ നടത്തി.സിപിഎം കണ്ണൂര്‍ ജില്ലാ സെക്രട്ടറി എം.വി. ജയരാജന്‍ ഇന്നലെ രാത്രി ആശുപത്രിയിലെത്തി. ജോസഫിന്‍റെ മരണത്തില്‍ സമഗ്രമായ അന്വേഷണം നടത്തണമെന്നും കാരണക്കാരായവരെ കണ്ടെത്തണമെന്നും ആവശ്യപ്പെട്ടു. സിപിഎം പെരിങ്ങോം ഏരിയ സെക്രട്ടറി സി.സത്യപാലല്‍, കെ.എം. ഷാജി, ഡിവൈഎഫ്‌ഐ കണ്ണൂര്‍ ജില്ലാ കമ്മിറ്റിയംഗം പി.പി. സിദിന്‍, ഡിഡിഎഫ് നേതാവ് ജയിംസ് പന്തമാക്കല്‍ എന്നിവരും സമഗ്രമായ അന്വേഷണം നടത്തണമെന്നാവശ്യപ്പെടുകയും പ്രതിഷേധം രേഖപ്പെടുത്തുകയും ചെയ്തു. ജോസഫിനെ സാമ്ബത്തികമായി വഞ്ചിച്ചവര്‍ക്കെതിരേ നരഹത്യയ്‌ക്ക് കേസെടുത്ത് അന്വേഷിക്കണമെന്ന് സിപിഐ ചെറുപുഴ ലോക്കല്‍ കമ്മിറ്റി ആവശ്യപ്പെട്ടു.