സംസ്ഥാനത്ത് പള്ളികൾ തുറക്കുമോ?; നിലപാട് വ്യക്തമാക്കി മുസ്ലീം സംഘടനകൾ
കോവിഡ് മൂലം അടച്ചിട്ട ആരാധനലയങ്ങൾ തുറക്കാനുള്ള തീരുമാനത്തില് നിന്ന് പല മുസ്ലീം സമുദായ സംഘടനകളും പിന്മാറുന്നു. ചില സംഘടനകള് നഗരത്തിലെ മസ്ജിദുകൾ മാത്രം അടച്ചിടാനുള്ള തീരുമാനത്തിലാണ്. എന്നാൽ മറ്റ് സംഘടനകൾ മുഴുവന് മസ്ജിദുകളും അടച്ചിടാനുള്ള തീരുമാനത്തിലാണ്. മുജാഹിദ് വിസ്ഡം വിഭാഗത്തിന് കീഴിലുള്ള കേരളത്തിലെ ഒരു പള്ളിയും തുറക്കില്ലെന്നാണ് തിരുമാനം. എന്നാൽ എപി സുന്നിവിഭാഗം നഗരപ്രദേശങ്ങളിലെ പള്ളികളൊന്നും തുറക്കേണ്ടെന്ന തീരുമാനത്തിലാണ്. അങ്ങനെയെങ്കിൽ എപി വിഭാഗത്തിന്റെ പകുതിയോളം പള്ളികള് സംസ്ഥാനത്ത് അടഞ്ഞ് കിടക്കും.
കോഴിക്കോട്ടെ മിഷ്ക്കാല് പള്ളി കൊവിഡ് വ്യാപന കാലത്ത് പള്ളി തുറക്കേണ്ടെന്നാണ് ഭാരവാഹികളുടെ തീരുമാനം. കോഴിക്കോട് നഗരത്തിലെ പ്രധാന പള്ളികളൊന്നും തുറക്കേണ്ടെന്ന തീരുമാനത്തിലാണ് മഹല്ല് കമ്മിറ്റികള്. സര്ക്കാര് പ്രഖ്യാപിച്ച നിബന്ധനകള് പാലിക്കാന് സാധിക്കാത്ത പള്ളികള് യാതൊരു കാരണവശാലും തുറക്കരുതെന്ന നിലപാടിലാണ് ജമാഅത്തെ ഇസ്ലാമി, മുജാഹിദ് കെ.എന്.എം വിഭാഗവും. കോഴിക്കോട്, എറണാകുളം, മലപ്പുറം, കണ്ണൂര് നഗരങ്ങളിലെ കെ.എന്.എം പള്ളികള് അടച്ചിടാനും തീരുമാനിച്ചിട്ടുണ്ട്.അതേസമയം സമസ്ത ഇ.കെ വിഭാഗം പള്ളികള് തുറക്കുമെന്ന് അറിയിച്ചിട്ടുണ്ട്. സര്ക്കാര് മാര്ഗ നിര്ദേശങ്ങള് കര്ശനമായി പാലിച്ചുകൊണ്ടാവും പ്രവര്ത്തനം. പള്ളികള് തുറക്കാനാണ് മുജാഹിദ്-സുന്നി സംസ്ഥാന നേതൃത്വം തീരുമാനിച്ചെങ്കിലും പലസ്ഥലങ്ങളിലും പ്രാദേശിക കമ്മിറ്റികള് പള്ളികള് തുറക്കരുതെന്ന തീരുമാനത്തിലാണ്.