അധ്യാപകനായി കലക്ടർ; ആത്മവിശ്വാസത്തോടെ  പരീക്ഷയെ നേരിടാൻ കുട്ടികൾ 

കലക്ടറേറ്റിൽ കഴിഞ്ഞ ദിവസം അധ്യാപകന്റെ റോളിലായിരുന്നു ജില്ലാ കലക്ടർ മീർ മുഹമ്മദലി. തമാശകൾ പറഞ്ഞും അനുഭവങ്ങൾ പങ്കുവെച്ചും അദ്ദേഹം കുട്ടികളുടെ കൈയടി നേടി. ആറളം ഫാം ഹൈസ്‌കൂളിലെ പത്താംതരം വിദ്യാർഥികളായ 59 കുട്ടികളാണ് ജില്ലാ കലക്ടറുടെ ക്ലാസ് കേൾക്കാനെത്തിയത്. ആത്മവിശ്വാസത്തോടെ പരീക്ഷയെ നേരിടുന്നതിന് ആവശ്യമായ തയ്യാറെടുപ്പുകളെക്കുറിച്ച് അദ്ദേഹം കുട്ടികളുമായി സംവദിച്ചു. 

പരീക്ഷയ്ക്ക് മുമ്പായി പാഠഭാഗങ്ങൾ എല്ലാം വായിക്കണമെന്ന് കലക്ടർ പറഞ്ഞു. എല്ലാ ചോദ്യങ്ങൾക്കും ഉത്തരം എഴുതാൻ ശ്രമിക്കേണ്ടതുണ്ട്. പരീക്ഷയെ ഭയപ്പെടേണ്ട ആവശ്യമില്ല. അനാവശ്യ ഭയം നമ്മുടെ റിസൽട്ടിനെ ബാധിക്കും. എത്രയും നേരത്തെ പഠനം ആരംഭിക്കുന്നുവോ അത്രയും ഗുണം റിസൾട്ടിൽ പ്രതിഫലിക്കും. അതുപോലെ തന്നെ പ്രധാനപ്പെട്ടതാണ് അവതരണരീതിയും. കൈയക്ഷരത്തിന് ഏറെ പ്രാധാന്യമുണ്ട്. പഠിക്കുന്ന വിഷയങ്ങളെക്കുറിച്ചോർത്ത് വ്യാകുലപ്പെടേണ്ടെന്നും എല്ലാ വിഷയങ്ങളിലും അറിവ് നേടണമെന്നും അദ്ദേഹം കൂട്ടിച്ചേർത്തു. മാർച്ച് 13 ന് എസ്എസ്എൽസി പരീക്ഷ തുടങ്ങാനിരിക്കെയാണ് പത്താംതരം വിദ്യാർഥികൾ കലക്ടറെ നേരിൽ കണ്ടത്. 

കലക്ടറേറ്റ് കോൺഫറൻസ് ഹാളിൽ നടന്ന പരിപാടിയിൽ ഒരു മണിക്കൂറോളം അദ്ദേഹം കുട്ടികളുമായി സംവദിച്ചു. സിവിൽ സർവ്വീസ് പരീക്ഷയ്ക്കുള്ള തന്റെ തയ്യാറെടുപ്പുകളും അനുഭവങ്ങളും കലക്ടർ കുട്ടികളുമായി പങ്കുവെച്ചു. ഫലപ്രദമായ പഠനരീതികളെക്കുറിച്ചും പരീക്ഷയ്ക്ക് എങ്ങനെ തയ്യാറെടുക്കണമെന്നതിനെക്കുറിച്ചും അദ്ദേഹം വിശദീകരിച്ചു. തുടർച്ചായി മണിക്കൂറുകളോളം പുസ്തകങ്ങൾക്ക് മുന്നിലിരിക്കരുതെന്നും ഏകാഗ്രതയോടെയുള്ള പഠനത്തിന് ചെറിയ ഇടവേളകൾ അനിവാര്യമാണെന്നും പറഞ്ഞ കലക്ടർ പോമോഡോറോ ടെക്നിക്ക് മികച്ച പഠനരീതിയാണെന്നും നിർദ്ദേശിച്ചു. ചെറിയ ഇടവേളകളിൽ 25 മിനുട്ട് നേരമുള്ള പഠന രീതിയാണ് പോമോഡോറോ ടെക്നിക്ക്. 

സ്ഥലസൗകര്യമുണ്ടെങ്കിൽ ആറളം ഫാം ഹൈസ്‌കൂളിന് സ്വന്തമായി ജിംനേഷ്യം നിർമ്മിക്കുമെന്ന് സംവാദത്തിനിടെ കലക്ടർ കുട്ടികൾക്ക് ഉറപ്പ് നൽകി. ക്ലാസുകൾക്ക് ശേഷം വിദ്യാർത്ഥികൾ കലക്ടറുടെ ചേംബർ സന്ദർശിച്ചു. പാഠ്യേതര വിഷയങ്ങളിൽ മികവ് പുലർത്തിയ രണ്ട് വിദ്യാർഥികളെ കലക്ടർ തന്റെ കസേരയിൽ ഇരുത്തിയത് കുട്ടികൾക്ക് പ്രചോദനമായി. ഇതിന് പുറമെ വിദ്യാർഥികൾക്ക് ഉച്ചഭക്ഷണത്തിനും കണ്ണൂർ സെൻട്രൽ മാൾ സന്ദർശിക്കാനുമുള്ള സൗകര്യവും കലക്ടർ ഒരുക്കിയിരുന്നു. മാളിൽ കലക്ടർ കുട്ടികളുമായി വിനോദങ്ങളിലേർപ്പെട്ടു. സ്‌കൂളിൽ അടുത്ത അധ്യയന വർഷം ഹയർസെക്കൻഡറി ക്ലാസുകൾ ആരംഭിക്കാനുള്ള തയ്യാറെടുപ്പുകൾ പുരോഗമിക്കുകയാണ്. ജില്ലാ പഞ്ചായത്ത് പ്രസിഡണ്ട് കെ വി സുമേഷ്, അസിസ്റ്റന്റ് കലക്ടർ അർജുൻ പാണ്ഡ്യൻ എന്നിവരും പരിപാടിയിൽ പങ്കെടുത്തു.

Leave a Reply

This site uses Akismet to reduce spam. Learn how your comment data is processed.

%d bloggers like this: