കണ്ണൂര്‍: എടിഎം കൗണ്ടറുകളില്‍നിന്നു പണമെടുക്കുമ്പോൾ പുറത്തേക്ക് വീഴുന്നതു വ്യാപകമാകുന്നു. പുതിയ സാങ്കേതികവിദ്യയില്‍ നിര്‍മിച്ച എടിഎമ്മുകളില്‍നിന്നാണ് പണമെടുക്കുമ്പോൾ പുറത്തേക്ക് വീഴുന്നത്. ചിലപ്പോള്‍ പണം വരുവാന്‍ മിനിറ്റുകളോളം താമസമെടുക്കും. ഈ സമയം ഇടപാടുകാരന്‍ പണം കിട്ടുകയില്ലെന്ന് വിചാരിച്ച്‌ പുറത്തേക്ക് പോവുകയും ചെയ്യും. എന്നാല്‍ മിനിറ്റുകള്‍ക്കകം പണം പുറത്ത് വന്നു തറയിലേക്ക് വീഴുകയും ചെയ്യും.നേരത്തെ എടിഎമ്മുകളില്‍നിന്ന് ഇടപാടുകാര്‍ പുറത്തുവരുന്ന പണം ട്രേയിലെത്തി അവിടെ നിന്ന് എടുക്കുകയായിരുന്നു ചെയ്തിരുന്നത്. ഇന്നു രാവിലെ കണ്ണൂര്‍ ചെട്ടിപ്പീടികയിലെ എസ്ബിഐ എടിഎം കൗണ്ടറില്‍ പണമെടുക്കാന്‍ ചെന്ന ഇടപാടുകാരന്‍ 500 രൂപയുടെ നോട്ടുകള്‍ തറയില്‍ കിടക്കുന്നതായി കാണുകയും പോലീസിനെ വിവരമറിയിക്കുകയുമായിരുന്നു. കണ്ണൂര്‍ ടൗണ്‍ പോലീസ് സംഭവസ്ഥലത്തെത്തി പണം കസ്റ്റഡിയിലെടുത്ത് ബാങ്ക് ഉദ്യോഗസ്ഥരെ വിളിച്ചുവരുത്തി പണം കൈമാറുകയും ചെയ്തു. അഞ്ഞൂറിന്‍റെ 20,000 രൂപയായിരുന്നു ചിതറിക്കിടന്നിരുന്നത്.